ಸೂರ್ಯನ ಸತ್ಪಥವು

ಬೆಲ್ಲ ಬೇಳೆಯು ಸೇರಿ ಹೋಳಿಗೆ ಆದಂತೆ
ಎಳ್ಳು ಬೆಲ್ಲವು ಸೇರಿ ಒಳ್ಳೆಯ ನುಡಿಯಂತೆ|

ಶರಣರಾ ಸ್ಮರಣೆ ಭವರೋಗ ಕಳೆವಂತೆ
ವೈಚಾರಿಕ ಕ್ರಾಂತಿ ಮೌಢ್ಯತೆಯ ತೊಡೆವಂತೆ|

ಸಜ್ಜನರ ನುಡಿಯು ಸಾತ್ವಿಕದ ಒಡಲಂತೆ
ಧರ್ಮದಾ ನಡೆಯು ತಾತ್ವಿಕದ ಕಡಲಂತೆ|

ರೈತನಾ ಬೆವರು ಮುತ್ತಾಗಿ ಸುರಿವಂತೆ
ಕಳೆತೆಗೆದು ಬೆಳೆಬೆಳೆದು ಹೊನ್ನುಗ್ಗಿ ಆದಂತೆ|

ರೈತನಾ ಕಸುವು (ಶಕ್ತಿ) ಹಸಿವು ನಿಗಿಸಿದಂತೆ
ನೆನೆಯೋಣ ನಿತ್ಯವೂ ದೇವರಾ ನೆನೆವಂತೆ|

ಎಳೆಯ ಕಂದಮ್ಮಗಳ ನಗುಉಕ್ಕಿ ಹರಿವಂತೆ
ಬೆಳೆದ ಬೆಳೆಯೆಲ್ಲಾ ಹೊನ್ನಾಗಿ ಹರಿವಂತೆ|

ಬಸವನಾ ಕ್ರಾಂತಿಯು ಹೊಸಯುಗವ ಬರೆದಂತೆ
ತೊತ್ತಾಗಿ ದುಡಿಯುವಾ ಎತ್ತುಗಳ ನೆನೆವಂತೆ|

ಸೂರ್ಯನ ಸತ್ಪಥವು ಸಂಕ್ರಾಂತಿಯಾದಂತೆ
ಸಮೃದ್ಧಿತರುವಾ ಸಂಕೇತದಂತೆ |

–ಸವಿತಾ ಮಾಟೂರು, ಇಳಕಲ್