ಆಧುನಿಕತೆಯ ಕಾಮನೆ ಮತ್ತು ಮಕ್ಕಳ ಭಾವನೆ
ಇಂದಿನ ಯುಗದಲ್ಲಿ ಆಧುನಿಕತೆಯ ಹೆಸರಿನಲ್ಲಿ ಜೀವನಶೈಲಿ ಬದಲಾವಣೆಗೊಳ್ಳುತ್ತಾ ಸಾಗಿದೆ. ಮೊದಲು ಆಟದ ಮೈದಾನದಲ್ಲಿ ಉಲ್ಲಾಸದಿಂದ ಓಡಾಡುತ್ತಿದ್ದ ಮಕ್ಕಳು ಈಗ ಡಿಜಿಟಲ್ ಪರದೆಗಳ ಹಿಂದೆ ತಮ್ಮ ಬಾಲ್ಯವನ್ನು ಕಳೆದುಕೊಳ್ಳುತ್ತಿದ್ದಾರೆ.
ಮೊದಲು ಸ್ನೇಹಿತರೊಂದಿಗೆ ಕಬ್ಬಡ್ಡಿ, ಚಿನ್ನಕ್ಕೋಲು, ಗುಳ್ಳಿ-ಮಣೆ ಆಡುತ್ತಿದ್ದ ಮಕ್ಕಳು ಇಂದು ಮೊಬೈಲ್ ಆಟಗಳ, ಸೋಶಿಯಲ್ ಮೀಡಿಯಾದ ಪ್ರಭಾವಕ್ಕೆ ಒಳಗಾಗುತ್ತಿದ್ದಾರೆ. ಇದರ ಪರಿಣಾಮವಾಗಿ, ಮಕ್ಕಳ ಮೌಖಿಕ ಕೌಶಲ್ಯ, ಸಹನಶೀಲತೆ, ಸೃಜನಶೀಲತೆ ಮತ್ತು ಮಾನವೀಯ ಮೌಲ್ಯಗಳು ನಿಧಾನವಾಗಿ ಕುಸಿಯುತ್ತಿವೆ.
ಈ ಸ್ಥಿತಿಯಲ್ಲಿ ಪೋಷಕರ ಜವಾಬ್ದಾರಿಗಳು ಹಿಂದಿನ ಪೋಷಕರಿಗಿಂತ ಇನ್ನಷ್ಟು ಹೆಚ್ಚಾಗಿವೆ. ಪೋಷಕರು ಕೇವಲ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯರಾಗುವುದು, ಹೊಸ-ಹೊಸ ಫ್ಯಾಷನ್ ಅನುಸರಿಸುವುದು ಅಥವಾ ರೀಲ್ಸ್ ಮಾಡುವ ಮಟ್ಟಕ್ಕೆ ಮಾತ್ರ ಸೀಮಿತರಾಗಬಾರದು. ಆಧುನಿಕತೆಯ ಅರ್ಥ ತಂತ್ರಜ್ಞಾನ ಬಳಸುವ ಶಕ್ತಿ ಮಾತ್ರವಲ್ಲ; ಅದನ್ನು ಯುಕ್ತಿಯುತವಾಗಿ, ಮಕ್ಕಳ ಒಳ್ಳೆಯ ಭವಿಷ್ಯಕ್ಕಾಗಿ ಹೇಗೆ ಬಳಸಬಹುದು ಎಂಬುದರ ಅರಿವು ಕೂಡ ಇರಬೇಕು.
ಮಕ್ಕಳ ಮೇಲಿನ ಆಧುನಿಕತೆಯ ಪ್ರಭಾವ
• ಅತಿಯಾದ ತಂತ್ರಜ್ಞಾನ ಮತ್ತು ಸೋಶಿಯಲ್ ಮೀಡಿಯಾ ಬಳಕೆ
ಮಕ್ಕಳಿಗೆ ಮೊಬೈಲ್, ಟ್ಯಾಬ್, ಲ್ಯಾಪ್‌ಟಾಪ್ ಮೊದಲಾದ ಡಿಜಿಟಲ್ ಸಾಧನಗಳು ಸಹಜವಾಗಿ ಲಭ್ಯವಿವೆ. ಆದರೆ, ಇದನ್ನು ಅವರು ಸರಿಯಾದ ಮಾರ್ಗದಲ್ಲಿ ಬಳಸದೆ, ಆನ್ಲೈನ್ ಗೇಮ್‌ಗಳಿಗೆ, ಅಪ್ರಸ್ತುತ ವಿಡಿಯೋಗಳಿಗೆ, ಮತ್ತು ಅಸಂಬಂಧಿತ ವಿಷಯಗಳಿಗೆ ಆಕರ್ಷಿತರಾಗುತ್ತಿದ್ದಾರೆ.
• ಸಂವೇದನಾತ್ಮಕ ದೌರ್ಬಲ್ಯ
ಮನೋರಂಜನೆಗಾಗಿ ವಿಡಿಯೋಗಳನ್ನು ನೋಡುತ್ತಿರುವ ಮಕ್ಕಳಿಗೆ, ಜೀವನದ ತೀರಾ ಸಣ್ಣ ಸಮಸ್ಯೆಗಳನ್ನೂ ಎದುರಿಸುವ ಸಾಮರ್ಥ್ಯ ಕಡಿಮೆಯಾಗುತ್ತಿದೆ.
• ಕುಟುಂಬ ಸಂಬಂಧಗಳಲ್ಲಿನ ಅಂತರ
ಮೊದಲು ಮನೆಮಂದಿಯೊಂದಿಗೆ ಮಾತನಾಡುವ ಸಮಯ ಹೆಚ್ಚು ಇರುತ್ತಿತ್ತು. ಈಗ, ಪ್ರತಿಯೊಬ್ಬರೂ ತಂತ್ರಜ್ಞಾನದಲ್ಲಿ ಮಗ್ನರಾಗಿರುವುದರಿಂದ, ಕುಟುಂಬದ ಬಾಂಧವ್ಯಗಳು ದೂರವಾಗುತ್ತಿವೆ.
ಪೋಷಕರ ಜವಾಬ್ದಾರಿ – ತಂತ್ರಜ್ಞಾನ ಬಳಕೆಯ ಜಾಣ್ಮೆ ಮತ್ತು ಮಾರ್ಗದರ್ಶನ
ಆಧುನಿಕ ಪೋಷಕರು ಕೇವಲ ಮಕ್ಕಳೊಂದಿಗೆ ಸ್ನೇಹಿತರಂತೆ ನಡೆದು ಬಿಡುವುದರಿಂದ ಸಾಲದು. ತಂತ್ರಜ್ಞಾನವನ್ನು ಎಷ್ಟು ಮತ್ತು ಹೇಗೆ ಬಳಸಬೇಕು ಎಂಬುದರ ಬಗ್ಗೆ ಅವರು ಹೆಚ್ಚು ಜಾಗೃತರಾಗಬೇಕಾಗಿದೆ.
• ಟೆಕ್ನೋ-ಸೇವಿ ಪೋಷಕರು
ಮಕ್ಕಳನ್ನು ಮಾರ್ಗದರ್ಶಿಸಲು ಪೋಷಕರು ತಾವೂ ತಂತ್ರಜ್ಞಾನವನ್ನು ಸರಿಯಾಗಿ ಅರ್ಥಮಾಡಿಕೊಳ್ಳಬೇಕು. ಮಕ್ಕಳ ಬರುವ ತರಗತಿಗಳು ಆನ್ಲೈನ್‌ನಲ್ಲಿ ನಡೆಯುತ್ತವೆ, ಹೊಸ ತಂತ್ರಜ್ಞಾನ ಕಲಿಯುತ್ತಾರೆ, ಆದರೆ ಪೋಷಕರು ಇದರ ವಿರುದ್ಧ ನಿಂತರೆ, ಮಕ್ಕಳು ಪೋಷಕರನ್ನು ನಿರ್ಲಕ್ಷ್ಯ ಮಾಡುತ್ತಾರೆ. ಆದ್ದರಿಂದ, ಪೋಷಕರು ಹೊಸ ತಂತ್ರಜ್ಞಾನ ಕಲಿಯಬೇಕು, ಮಕ್ಕಳೊಂದಿಗೆ ಚರ್ಚಿಸಬೇಕು, ಮತ್ತು ನೈತಿಕ ಬಳಕೆಯ ಬಗ್ಗೆ ಮಕ್ಕಳಿಗೆ ತಿಳಿಸಬೇಕು.
• ಪೋಷಕರು ಸಾವಧಾನವಾಗಿರಬೇಕು
• ಮಕ್ಕಳು ಏನೆಲ್ಲಾ ನೋಡುತ್ತಿದ್ದಾರೆ, ಅವರ ಚಟುವಟಿಕೆಗಳ ಪರಿಣಾಮಗಳು ಏನಾಗಬಹುದು, ಅವರು ಯಾರನ್ನು ಅನುಸರಿಸುತ್ತಿದ್ದಾರೆ – ಈ ಎಲ್ಲ ವಿಷಯಗಳ ಬಗ್ಗೆ ಪೋಷಕರು ಎಚ್ಚರಿಕೆಯಿಂದ ಇರಬೇಕು. ಆದರೆ ಇದು ಕಠಿಣ ನಿಯಂತ್ರಣ ಆಗಬಾರದು; ಬದಲಿಗೆ, ಪೋಷಕರು ಮಕ್ಕಳಿಗೆ ಸ್ಪಷ್ಟ ಮತ್ತು ಪ್ರಾಮಾಣಿಕ ಮಾರ್ಗದರ್ಶನ ನೀಡಬೇಕು.
• ಶಿಕ್ಷಕರೊಂದಿಗೆ ಉತ್ತಮ ಸಂಬಂಧ
ಪೋಷಕರು ಶಾಲಾ ಶಿಕ್ಷಕರೊಂದಿಗೆ ಉತ್ತಮ ಸಂಬಂಧ ಹೊಂದಿದರೆ, ಮಕ್ಕಳ ಗುಣಾವಗುಣಗಳು, ಅವರ ಆಸಕ್ತಿ ಕ್ಷೇತ್ರಗಳು, ಶಿಕ್ಷಣದ ಮೇಲೆ ಇರುವ ಆಭಿರುಚಿ ಇತ್ಯಾದಿಗಳನ್ನು ತಿಳಿದುಕೊಳ್ಳಬಹುದು. ಮಕ್ಕಳು ಪೋಷಕರಿಗೆ ಹೇಳದ ವಿಷಯಗಳನ್ನು ಶಾಲೆಯಲ್ಲಿ ವ್ಯಕ್ತಪಡಿಸುತ್ತಾರೆ. ಆದ್ದರಿಂದ, ಶಾಲೆ ಮತ್ತು ಮನೆಯ ನಡುವಿನ ಸಮನ್ವಯ ಬಹಳ ಮುಖ್ಯ.
• ಮಕ್ಕಳಿಗೆ ಪರಿಣಾಮಕಾರಿ ಸಂವಹನ ಕೌಶಲ್ಯ
ಮಕ್ಕಳಿಗೆ ಪೋಷಕರೊಂದಿಗೆ ತಮ್ಮ ಭಾವನೆಗಳನ್ನು ಹಂಚಿಕೊಳ್ಳಲು ಮುಕ್ತ ವಾತಾವರಣ ಕಲ್ಪಿಸಬೇಕು. ಪೋಷಕರು ಧೈರ್ಯ ತುಂಬುವವರಾಗಿರಬೇಕು, ಮಕ್ಕಳ ತಪ್ಪನ್ನು ತಿರಸ್ಕಾರದಿಂದ ನೋಡಬಾರದು. ಮಕ್ಕಳೊಂದಿಗೆ ಸದಾ ಸಮಾಲೋಚನೆ, ನಂಬಿಕೆಯಿಂದ ಮಾತನಾಡಬೇಕು.ಈ ಮೂಲಕ, ಮಕ್ಕಳು ಪೋಷಕರಿಗೆ ಪ್ರಾಮಾಣಿಕರಾಗಲು, ಅವರೊಂದಿಗೆ ಯಾವುದೇ ವಿಷಯಗಳನ್ನೂ ಮುಕ್ತವಾಗಿ ಹಂಚಿಕೊಳ್ಳಲು, ಮತ್ತು ತಪ್ಪು ಮಾಡದ ದಿಕ್ಕಿನಲ್ಲಿ ಸಾಗಲು ಸಾಧ್ಯ.
ಆಧುನಿಕತೆಯ ಹೆಸರಿನಲ್ಲಿ ಪೋಷಕರು ಮಕ್ಕಳಿಗೆ ಅತಿಯಾದ ಸ್ವಾತಂತ್ರ್ಯ ನೀಡುವುದು ಸರಿ ಅಲ್ಲ, ಆದರೆ ಸಂಪೂರ್ಣವಾಗಿ ನಿಯಂತ್ರಿಸುವುದೂ ಸರಿಯಲ್ಲ. ಸಮತೋಲನ ಅತೀ ಅವಶ್ಯಕ. ಪೋಷಕರು ಮಕ್ಕಳು ಎದುರಿಸುವ ಹೊಸ ಸವಾಲುಗಳನ್ನು ಅರ್ಥಮಾಡಿಕೊಳ್ಳಬೇಕು, ತಂತ್ರಜ್ಞಾನದಲ್ಲಿ ಜಾಣ್ಮೆ ಬೆಳೆಸಿಕೊಳ್ಳಬೇಕು, ಮಕ್ಕಳೊಡನೆ ಸ್ನೇಹಭಾವವನ್ನು ನಿರ್ಮಿಸಿಕೊಳ್ಳಬೇಕು ಮತ್ತು ಅಗತ್ಯವಾದಾಗ ಕಟ್ಟುನಿಟ್ಟಾದ ಹಾದಿಯಲ್ಲಿ ನಡಿಸಬೇಕು. ಈ ರೀತಿಯಾಗಿ, ಪೋಷಕರು ತಮ್ಮ ಮಕ್ಕಳನ್ನು ನಿಜವಾದ ಆಧುನಿಕತೆ – ಸಂಸ್ಕಾರದ ಬೆಳಕಿನಲ್ಲಿ ಬೆಳೆಯುವಂತೆ ಮಾರ್ಗದರ್ಶನ ಮಾಡಬಹುದು.
–ವಾಣಿ ಭಟ್, ವಾಪಿ, ಗುಜರಾತ್