ಅಕಾಲಿಕ ಮಳೆಗೆ ಭತ್ತದ ಬೆಳೆ ನಾಶ,, ರೈತರ ಗದ್ದೆಯಲ್ಲಿ ನಿಂತ ನೀರು

ಅಕಾಲಿಕ ಮಳೆಗೆ ಭತ್ತದ ಬೆಳೆ ನಾಶ,, ರೈತರ ಗದ್ದೆಯಲ್ಲಿ ನಿಂತ ನೀರು

e-ಸುದ್ದಿ, ಮಸ್ಕಿ

ಮಸ್ಕಿ ತಾಲೂಕಿನ ಸಮೀಪದ ಸುಂಕನೂರು, ಕಡಬೂರು, ಕ್ಯಾತ್ನಟ್ಟಿ, ಬಳಗಾನೂರು ಗ್ರಾಮಗಳಲ್ಲಿ ಗುರುವಾರ ಮತ್ತು ಶುಕ್ರವಾರ ರಾತ್ರಿ ಅಕಾಲಿಕವಾಗಿ ಸುರಿದ ಮಳೆ ಭತ್ತವನ್ನು ನಾಶ ಮಾಡಿದ್ದು  ರೈತರನ್ನು ಸಂಕಷ್ಟಕ್ಕೆ ದೂಡಿದೆ.

ಕೊಯ್ಲಿನ ಬಳಿಕ ಹಾಕಿದ ಭತ್ತ ರಾಶಿ ತೊಯ್ಯುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ತುಂಗಭದ್ರಾ ಎಡದಂಡೆ ಕೆಳ ಮಟ್ಟದ ಕಾಲುವೆಗೆ, ಜಲಾಶಯದಿಂದ ನೀರು ಬಿಟ್ಟ ನಂತರ ಭತ್ತ ಹಾಕಲಾಯಿತು. ಕೊಯ್ಲು ಮುಗಿಸಿ ವಿವಿಧ ತಳಿಯ, ಭತ್ತವನ್ನು ರಾಶಿ ಹಾಕಲಾಗಿದೆ. ಕೆಲವೆಡೆ, ಕಟಾವು ಮಾಡುವ ಕಾರ್ಯ ತ್ವರಿತಗತಿಯಲ್ಲಿ ಸಾಗಿದೆ. ಅಕಾಲಿಕವಾಗಿ ಮಳೆಯಾಗುತ್ತಿರುವುದರಿಂದ ಕೊಯ್ಲು ಮಾಡಿ ರಾಶಿ ಹಾಕಿದ ಭತ್ತ ಮಳೆ ನೀರಿಗೆ ಭಾಗಶಃ ತೋಯ್ದಿದೆ.

ಮುಚ್ಚಲು ಬರಕದ ಮೊರೆ: ಹಲವು ರೈತರು ಹಾಕಿದ ರಾಶಿಯನ್ನು ಜತನ ಮಾಡಲು ಬರಕದ ಮೊರೆ ಹೋಗಿದ್ದಾರೆ. ತೊಯ್ದ ಭತ್ತವನ್ನು ಒಣಗಿಸುವ ಕಸರತ್ತು ನಡೆಸಿದ್ದು, ಮೊಳಕೆಯೊಡೆಯದಂತೆ ಕಾಪಾಡುವ ಕಸರತ್ತು ನಡೆಸಿದ್ದಾರೆ. ಈಗಾಗಲೇ, ನಾಟಿ, ರಸಗೊಬ್ಬರ, ಕೂಲಿ ವೆಚ್ಚಕ್ಕಾಗಿ ಸಾವಿರಾರು ರೂ.ವ್ಯಯಿಸಿದ ರೈತರಿಗೆ ಇದೀಗ ಭತ್ತ ಕಾಯುವ ಸವಾಲು ಎದುರಾಗಿದೆ. ರಾಶಿ ಹಾಕಿದ ಭತ್ತ ತೋಯ್ದ ಕಂದು ಬಣ್ಣಕ್ಕೆ ತಿರುಗುವ ಸಾಧ್ಯತೆ ಕಾಣಿಸಿದೆ. ಬೆಲೆ ಕಡಿಮೆಯಾಗುತ್ತದೆ ಎನ್ನುವ ಚಿಂತೆ ರೈತರನ್ನು ಕಾಡುತ್ತಿದೆ.

ನುಚ್ಚಾಗುವ ಭೀತಿ 

ಹದವಾಗಿ ಮಳೆಯಾಗಿರುವುದರಿಂದ ಇನ್ನೂ ಕಟಾವು ಮಾಡುವ ಹಂತದಲ್ಲಿನ ಭತ್ತದ ತೆನೆ ತೋಯ್ದು, ಗಿರಣಿ ಮಾಡಿಸಿದರೆ, ನುಚ್ಚಾಗುವ ಸಂಭವ ಹೆಚ್ಚಾಗಿದೆ. ಇನ್ನೂ ಕೆಲ ದಿನ ಮಳೆ ಹಿಡಿದರೆ, ತೆನೆ ಮೂಳಕೆ ಒಡೆಯುವ ಸಾಧ್ಯತೆ ಇದ್ದು, ಬೆಳೆ ಹಾಳಾಗುತ್ತದೆ. ಸಮೃದ್ಧವಾಗಿ ಬೆಳೆದ ಗದ್ದೆ ಮಳೆ ಹೊಡೆತಕ್ಕೆ ಅಲ್ಲಲ್ಲಿ ನೆಲಕ್ಕೆ ಬಿದ್ದಿದ್ದು, ರೈತರಿಗೆ ಬೆಳೆ ಹಾನಿಯಾಗುತ್ತದೆ.

ಮಳೆಯಾಗಿ ಗದ್ದೆಯಲ್ಲಿ ನೀರು ನಿಂತ ಪರಿಣಾಮ, ಗದ್ದೆಯನ್ನು ಕೊಯ್ಲು ಮಾಡಲು ಇನ್ನೂ ಸ್ವಲ್ಪ ದಿನ ತೆಗೆದುಕೊಳ್ಳುತ್ತದೆ. ಹೀಗಾಗಿ ಗುಣಮಟ್ಟದ ಭತ್ತ ಬರುವುದಿಲ್ಲ. ಜತೆಗೆ ಇಳುವರಿ ಕುಸಿತವಾಗುತ್ತದೆ. ಕಟಾವು ಮಾಡುವ ಯಂತ್ರಗಳ ಬಾಡಿಗೆ ಹೆಚ್ಚಾಗತ್ತದೆ ಎಂದು ರೈತರು ಆತಂಕ ಗೊಂಡಿದ್ದಾರೆ.

ಪರಿಹಾರಕ್ಕೆ ಒತ್ತಾಯ
ಬಳಗಾನೂರ, ಹೋಬಳಿಯ ಅಕಾಲಿಕ ಮಳೆಯಿಂದಾಗಿ ಬೆಳೆ ಹಾನಿ ಸಂಭವಿಸಿದ್ದು, ಪರಿಹಾರ ವಿತರಿಸುವುದಕ್ಕಾಗಿ ಸಮೀಕ್ಷೆ ನಡೆಸಬೇಕು ಎಂದು ಬಳಗನೂರ್ ಗ್ರಾಮದ ರೈತರು ಒತ್ತಾಯಿಸಿದ್ದಾರೆ.
ಬೆಲೆ ಕುಸಿತದಿಂದ ಸಂಕಷ್ಟ ಎದುರಿಸುತ್ತಿರುವ ರೈತರು, ಕಟಾವಿನ ಹಂತಕ್ಕೆ ಬಂದಾಗ ಸುರಿಯುತ್ತಿರುವ ಮಳೆ ಮತ್ತೊಂದು ಕಷ್ಟ ಒಡ್ಡಿದೆ. ರೈತರ ಪರಿಸ್ಥಿತಿ ಅರಿತು, ಸಮೀಕ್ಷೆ ನಡೆಸುವ ಮೂಲಕ ನಷ್ಟ ಪರಿಹಾರ ಭರಿಸಬೇಕು ಎಂದು ರೈತರು ಒತ್ತಾಯಿಸಿದ್ದಾರೆ