ಮುಕ್ತ ಸಂವಾದಕ್ಕೆ ‘ಕ್ಲಬ್ ಹೌಸ್’ ವೇದಿಕೆ ಸೂಕ್ತ
–
ನಮ್ಮೆಲ್ಲರ ದುಃಖ, ಖುಷಿ, ನಗು, ಮಾತು, ಮಂಥನ, ಚಿಂತನೆ, ಪೋಟೋ, ವಿಡಿಯೋ ಸೇರಿದಂತೆ ಬದುಕಿನ ಪ್ರತಿಕ್ಷಣದ ಆಗುಹೋಗುಗಳನ್ನು ನಾವು ಸಾಮಾಜಿಕವಾಗಿ ಹಂಚಿಕೊಳ್ಳುವ ತುಡಿತಕ್ಕೆ ಒಳಗಾಗಿದ್ದೇವೆ.
ಅಷ್ಟೇ ಅಲ್ಲದೆ ಕಥೆ, ಕವನ, ಲೇಖನ, ಹಾಸ್ಯ, ಚಿತ್ರಕಲೆ, ಸಂಗೀತ ಸೇರಿ ನಮ್ಮ ಹವ್ಯಾಸಗಳು ಇತರರಿಗೆ ತಲುಪಿಸುವ ಪ್ರಯತ್ನ, ತುಡಿತ, ಕಾತುರ ನಮ್ಮನ್ನು ಕಾಡುತ್ತಿದೆ. ಹಾಗೂ ಪ್ರಚಲಿತ ವಿದ್ಯಮಾನಗಳ ಕುರಿತು ತಿಳಿದುಕೊಳ್ಳುವ ಕುತೂಹಲ ಕೂಡ ಸಾಮಾಜಿಕ ಜಾಲತಾಣ ವೇಗವಾಗಿ ಪೂರೈಸಿದೆ. ಹೀಗಾಗಿ ಎಲ್ಲದಕ್ಕೂ ಸಾಮಾಜಿಕ ಜಾಲತಾಣಗಳು ನಮಗೆ ಸೂಕ್ತ ವೇದಿಕೆಯಾಗಿವೆ. ಸಾಮಾಜಿಕ ಜೀವನಕ್ಕೆ ಸಾಮಾಜಿಕ ಜಾಲತಾಣಗಳು ಅದೆಷ್ಟು ಉಪಯುಕ್ತವಾಗಿಯೋ ಅಷ್ಟೇ ಅಪಾಯಕಾರಿ ಕೂಡ ಆಗಿವೆ. ಆದರೆ ದೈಹಿಕವಾಗಿ ಅದೆಷ್ಟೇ ದೂರವಿದ್ದವರೂ ಬೌದ್ಧಿಕವಾಗಿ ಹತ್ತಿರವಾಗಿ ಗಾಢವಾದ ಪ್ರೀತಿ ತೋರುತ್ತಾರೆ,ಆಪ್ತರಾಗಿ, ಸ್ನೇಹ, ಸಂಬಂಧ ಮತ್ತಷ್ಟು ಗಟ್ಟಿಯಾಗಿ ಕಾಪಿಟ್ಟುಕೊಳ್ಳುತ್ತಾರೆ.
ಸಾಮಾಜಿಕ ಜಾಲತಾಣಗಳು ನಮ್ಮ ದೈನಂದಿನ ಬದುಕಿನಲ್ಲಿ ಹೊಸ ಚೈತನ್ಯ ತುಂಬುತ್ತಿವೆ, ಭರವಸೆ ಮೂಡಿಸುತ್ತಿವೆ, ಸ್ಫೂರ್ತಿ ನೀಡುವ ಗುಡ್ ಎಂದು ಹೇಳಿದರೂ ತಪ್ಪಾಗಲಾರದು. ಇಂಥ ಸೋಶಿಯಲ್ ಮೀಡಿಯಾ ಪಟ್ಟಿಯಲ್ಲಿ ಈಗ ಇನ್ನೊಂದು ‘ಆಡಿಯೋ ತಾಣ’ ಸೇರ್ಪಡೆಯಾಗಿದೆ. ಈಗಾಗಲೇ ಇದರ ಬಗ್ಗೆ ನಿಮಗೆ ತಿಳಿದಿರಬಹುದು. ಇನ್ನುಳಿದ ಅಪ್ಲಿಕೇಶನ್ ಗಿಂತ ಹೆಚ್ಚು ಜನಪ್ರಿಯವಾಗುತ್ತಿರುವ ಕ್ಲಬ್ ಹೌಸ್ ಆ್ಯಪ್ ಈಗಿರುವ ಫೇಸ್ ಬುಕ್, ಇನ್ ಸ್ಟಾಗ್ರಾಂ, ಟ್ವಿಟ್ಟರ್ ನಂತಹ ಸಾಮಾಜಿಕ ಜಾಲತಾಣಗಳಿಗೆ ತೀವ್ರ ಪೈಪೋಟಿ ನೀಡುವ ಮೂಲಕ ಜಗತ್ತಿನಾದ್ಯಂತ ಹೆಚ್ಚು ಸುದ್ದಿಯಾಗುತ್ತಿದೆ.
ಕೆಲ ದಿನಗಳ ಹಿಂದಷ್ಟೇ ಜನ್ಮತಾಳಿದ ‘ಕ್ಲಬ್ ಹೌಸ್’ ಹೆಚ್ಚಿನ ಜನರನ್ನು ಆಕರ್ಷಿಸುತ್ತಿದೆ. ಇದರಿಂದ ದಿನದಿಂದ ದಿನಕ್ಕೆ ತನ್ನ ಬಳಕೆದಾರರ ಸಂಖ್ಯೆ ಹೆಚ್ಚಿಸಿಕೊಳ್ಳುತ್ತಿದೆ. ಮೊದ ಮೊದಲಿಗೆ ‘ಕ್ಲಬ್ ಹೌಸ್ ‘ ಎಂದರೆ ಬಹಳಷ್ಟು ಜನರಿಗೆ ಮಾಹಿತಿಯೇ ಇರಲಿಲ್ಲ. ಕ್ಲಬ್ ಹೌಸ್ ಎಂದರೆ ಯಾವುದಾದರೂ ಒಂದು ವಿಷಯದ ಕುರಿತು ಚರ್ಚಿಸುವ ಪ್ರತ್ಯೇಕ ಸ್ಥಳವಾಗಿರಬಹುದು, ಬಾರ್, ರೆಸ್ಟೋರೆಂಟ್ ಅಥವಾ ಮೋಜು ಮಸ್ತಿ ಮಾಡುವ ಪಾರ್ಕ್ ತಾಣವಾಗಿರಬಹುದು ಎಂದೇ ತಿಳಿದಿದ್ದು ನಿಜ. ಮೊದಲಿಗೆ ಈ ರೀತಿಯ ಕನ್ಫ್ಯೂಜನ್ ಆಗುವುದು ಸಹಜ. ಆದರೆ ನಾವು ಅರ್ಥೈಸಿಕೊಂಡಷ್ಟು ಮಾಮೂಲಿ ‘ಆ್ಯಪ್’ ಇದಲ್ಲ, ಎಲ್ಲಾ ಸಾಮಾಜಿಕ ಜಾಲತಾಣಗಳಿಗಿಂದ ಇದು ಒಂದು ತುಸು ವಿಭಿನ್ನ ರೀತಿಯ ಜಾಲ-ತಾಣವಾಗಿದೆ ಎಂದು ತಿಳಿಯಬೇಕಾದರೆ ನೀವೂ ‘ಕ್ಲಬ್ ಹೌಸ್ ‘ ಗೆ ಬರಬೇಕು.
ಹಾಗಾದರೆ ‘ಕ್ಲಬ್ ಹೌಸ್’ ಅಪ್ಲಿಕೇಶನ್ ವೈಶಿಷ್ಟ್ಯತೆ ಏನು? ಎಂದರೆ ಇನ್ನಿತರೆ ಸಾಮಾಜಿಕ ಜಾಲತಾಣಗಳಂತೆ ಇಲ್ಲಿ ಫೋಟೋ, ವಿಡಿಯೋ ಪೋಸ್ಟ್ ಹಾಗೂ ಟೈಪ್ ಮಾಡಲು ಯಾವುದೇ ಆಯ್ಕೆಗಳಿಲ್ಲ, ಕಾಲ್ ಮಾಡುವ ಹಾಗಿಲ್ಲ. ಬದಲಾಗಿ ‘ವಾಯ್ಸ್ ಚಾಟ್’ ಮುಖಾಂತರ ಸಂಭಾಷಣೆ ಮಾಡಬಹುದು. ಒಬ್ಬರು ‘ಆಡಿಯೋ ಸಂಭಾಷಣೆ’ ಮಾಡುವಾಗ ಉಳಿದವರು ಕಿವಿಯಾಗಿ ಕೇಳಬೇಕು. ನಂತರ ಮ್ಯೂಟ್ ಆನ್ ಮಾಡಿ ನಾವು ಮಾತಾಡಬಹುದು.
ಜಗತ್ತಿನ ಯಾವುದೇ ಸ್ಥಳದಲ್ಲಿದ್ದರೂ ‘ಕ್ಲಬ್ ಹೌಸ್’ ಬಳಸಬಹುದು, ಅಲ್ಲಿಯ ಎಲ್ಲಾ ಚರ್ಚೆಯಲ್ಲಿ ಭಾಗವಹಿಸಬಹುದು.
ಕ್ಲಬ್ ಹೌಸ್ ಸಂವಾದದಲ್ಲಿ ಭಾಗಿಯಾಗಲು ನೀವು ಯಾರಿಗೂ ನಿಮ್ಮ ಮೊಬೈಲ್ ನಂಬರ್ ಕೊಡುವ ಅಗತ್ಯವಿಲ್ಲ. ಯಾವುದೇ ಗ್ರೂಪ್ ಸೇರುವ ಜರೂರಿ ಇಲ್ಲ, ಒಮ್ಮೆ ಪ್ಲೇ ಸ್ಟೋರ್ ನಲ್ಲಿ ಡೌನ್‌ಲೋಡ್ ಮಾಡಿಕೊಂಡು ಮೊಬೈಲ್ ನಂಬರ್ ಸೇರಿಸಿ ಕ್ಲಬ್ ಹೌಸ್ ಸೇರಿದರೆ ಸಾಕು. ಅಲ್ಲಿರುವ ಯಾವುದೇ ಗ್ರೂಪ್ ಗೆ ನೀವೇ ಸೇರಬಹುದು. ಕ್ಲಬ್ ಹೌಸ್ ನ ಇನ್ನೊಂದು ವಿಶೇಷವೆಂದರೆ ಅಲ್ಲಿ ನಡೆಯುವ ಯಾವುದೇ ಸಂವಾದದಲ್ಲಿ ನೀವು ಸೇರಲು ಮುಕ್ತ ಅವಕಾಶವಿದೆ. ಬಹುಶಃ ನಿಮಗೆ ಅದು ಇಷ್ಟ ಆಗಲಿಲ್ಲ ಎಂದರೆ ಗ್ರೂಪ್ ದಿಂದ ಹೊರಬರಲು ಅವಕಾಶವಿದೆ. ಬೇರೆ ವಿಷಯಗಳ ಚರ್ಚೆಯಲ್ಲಿ ಮತ್ತೆ ಸೇರಬಹುದು. ಇದು ನಮಗಿಷ್ಟದಂತೆ ಬಳಸುವ ಅಪರೂಪದ ತಾಣವಾಗಿದೆ.
ಫೋಟೊ, ವಿಡಿಯೋ, ಮೆಸೇಜ್ ಗಳ ಮೂಲಕ ಸಂಪರ್ಕಿಸಲು ನಮಗೆ ಹಲವು ಸಾಮಾಜಿಕ ಜಾಲತಾಣಗಳಿವೆ, ಆದರೆ ವಾಯ್ಸ್ ಚಾಟ್ ಮೂಲಕ ಚರ್ಚೆ ನಡೆಸಲು ಯಾವುದೇ ಆ್ಯಪ್ ಗಳಿರಲಿಲ್ಲ. ಕೆಲವು ಇದ್ದರೂ ಅಷ್ಟು ಮುನ್ನೆಲೆಗೆ ಬಂದಿರಲಿಲ್ಲ. ಹೀಗಾಗಿ ಕ್ಲಬ್ ಹೌಸ್ ಆ್ಯಪ್ ಎಲ್ಲಕಿಂತ ಹೆಚ್ಚು ವಿಶಿಷ್ಟವಾಗಿ ಕಾಣುತ್ತದೆ. ಕ್ಲಬ್ ಹೌಸ್ ನಲ್ಲಿ ಎಲ್ಲಾ ರೀತಿಯ ಜನರಿದ್ದಾರೆ. ಕ್ಲಬ್ ಹೌಸ್ ಚರ್ಚೆ ಕೇವಲ ಲೈವ್ ನಲ್ಲೇ ಮಾತ್ರ ನಡೆಸಬಹುದು. ಅಲ್ಲಿ ರೆಕಾರ್ಡ್ ಮಾಡುವ ಯಾವುದೇ ಆಯ್ಕೆ ಇಲ್ಲ. ಇದು ಇನ್ನೊಂದು ವಿಭಿನ್ನ. ಕ್ಲಬ್ ಹೌಸ್ ಚರ್ಚೆಯಲ್ಲಿ ನಮಗೆ ಭಾಗಿಯಾಗಲು ಸಾಧ್ಯವಾಗದೇ ಆಮೇಲೆ ವೈಸ್ ರೆಕಾರ್ಡ್ ಕೇಳಬೇಕೆಂದರೆ ಸಾಧ್ಯವಿಲ್ಲ. ಲೈವ್ ಚರ್ಚೆಯಲ್ಲಿ ಭಾಗವಹಿಸುವ ಅವಕಾಶ ಮಾತ್ರ ಇದೆ. ಆದರೆ ನಮಗೆ ಅಗತ್ಯವಾದ ಸಮಯಕ್ಕೆ ಚರ್ಚೆ ಸಂವಾದ, ಗೋಷ್ಠಿ ನಡೆಸುವ ಬಗ್ಗೆ ಮೊದಲೇ ನಿಗದಿಪಡಿಸಬೇಕು. ಇದರಿಂದ ಹೆಚ್ಚಿನ ಜನರು ಚರ್ಚೆಯಲ್ಲಿ ಭಾಗಯಾಗಲು ಸಾಧ್ಯ. ಚರ್ಚೆಯ ವಿಷಯ, ಸಮಯ, ದಿನಾಂಕ ಕುರಿತು ಇತರೇ ತಾಣಗಳಲ್ಲಿ ಲಿಂಕ್ ಕಾಪಿ ಶೇರ್ ಮಾಡಬಹುದು.
ಈ ಆ್ಯಪ್ ಎಲ್ಲಾ ಅಂಡ್ರಾಯ್ಡ್ ನಲ್ಲೂ ದೊರೆಯುತ್ತದೆ. ಇದರ ಫೀಚರ್ ಗಳು ಹೆಚ್ಚು ವಿಶೇಷವಾಗಿದ್ದು ಡೌನ್ ಲೋಡ್ ಸಂಖ್ಯೆಯೂ ಅತ್ಯಧಿಕವಾಗಿದೆ. ಕ್ಲಬ್ ಹೌಸ್ ನಲ್ಲಿ ಯಾವುದೇ ಒಂದು ಟಾಪಿಕ್ ನಲ್ಲಿ ಗ್ರೂಪ್ ರಚಿಸಬಹುದು. ಅದರ ಕೆಳಗೆ ಹಾಡು, ಹರಟೆ, ಸಂವಾದ, ಸಂಗೀತ, ಕಥೆ ಸೇರಿದಂತೆ ರಾಜಕೀಯ, ಆರ್ಥಿಕ, ಸಾಮಾಜಿಕ, ಶೈಕ್ಷಣಿಕ ವಿಷಯಗಳ ಕುರಿತು ಚರ್ಚಿಸಬಹುದು. ಚರ್ಚೆಯಲ್ಲಿ ವಿಷಯ ಮಂಡಿಸಲು ವಿಶೇಷ ಅತಿಥಿಗಳಿಗೆ ಆಹ್ವಾನ ನೀಡಬಹುದು. ಚರ್ಚೆಯಲ್ಲಿ ಆಗುವ ವಿಷಯಗಳಿಗೆ ನಾವು ಕಿವಿಯಾಗಬಹುದು. ಗ್ರೂಪ್ ಮಾಡರೇಟರ್ ಅವಕಾಶ ನೀಡಿದರೆ ನಮಗೆ ಮಾತನಾಡಲು ಅವಕಾಶ ಸಿಗುತ್ತದೆ.
ಅಪರಿಚಿತ, ಪರಿಚಿತರಾದ ಹೆಸರಾಂತ ವ್ಯಕ್ತಿಗಳ ಜೊತೆಗೆ ನಮ್ಮಸಂವಾದ ನಡೆಸಲು ಕ್ಲಬ್ ಹೌಸ್ ಸೂಕ್ತ ವೇದಿಕೆ ಒದಗಿಸಿದೆ.
ಕ್ಲಬ್ ಹೌಸ್ ನಲ್ಲಿ ಚಾಟ್ ರೂಮ್ ಮೂಲಕ ಬಳಕೆದಾರರು ಮಾತನಾಡಬಹುದು. ಒಂದೇ ಸಮಯಕ್ಕೆ ಸಾವಿರಾರು ಜನರು ಒಟ್ಟಿಗೆ ಸೇರಿ ಗುಂಪಿನಲ್ಲಿ ವಾಯ್ಸ್ ಚಾಟಿಂಗ್ ಮೂಲಕ ಚರ್ಚಿಸುವ ಸೌಲಭ್ಯವಿದೆ. ಆ ಗ್ರೂಪ್ ಚರ್ಚೆ ಇಷ್ಟವಾಗದಿದ್ದರೆ ಗ್ರೂಪ್ ದಿಂದ ಲೀವ್ ಆಗಬಹುದು.
ಆಪ್ ಡೌನ್‌ಲೋಡ್ ಮಾಡಿಕೊಂಡು ಅಕೌಂಟ್ ಕ್ರಿಯೇಟ್ ಮಾಡಿ, ಜಗತ್ತಿನ ಪ್ರಸಿದ್ಧ ವ್ಯಕ್ತಿಗಳಿಗೆ, ನಿಮ್ಮ ಒಡನಾಟದ ದೂರದ ಸ್ನೇಹಿತರನ್ನು ಫಾಲೋ ಮಾಡಬಹುದು. ಕ್ಲಬ್ ಹೌಸ್ ಚರ್ಚೆಯಲ್ಲಿ ಸೇರಿ ಅದನ್ನು ಕೇಳುತ್ತಲೇ ಸೌಂಡ್ ಇಲ್ಲದ ವ್ಯಾಟ್ಸಪ್ , ಫೇಸ್ ಬುಕ್ ಸೇರಿದಂತೆ ಇತರೆ ಆಪ್ ಗಳು ಬಳಸಬಹುದು. ಕಿವಿಗೆ ಹೆಡ್ ಫೋನ್ ಹಾಕೊಂಡು ಬೇರೆ ಕೆಲಸ ಮಾಡುತ್ತಲೇ ಕ್ಲಬ್ ಹೌಸ್ ಅಲಿಸಬಹುದು. ಇದೀಗ ಕೋಟ್ಯಾಂತರ ಜನರು ಕ್ಲಬ್ ಹೌಸ್ ಬಳಸುತ್ತಿದ್ದಾರೆ. ಸ್ಟಾರ್ ನಟ-ನಟಿಯರು, ಉದ್ಯಮಿಗಳು, ವಿದ್ಯಾರ್ಥಿಗಳು, ಲೇಖಕರು, ರಾಜಕೀಯ ನಾಯಕರು ಈ ಆ್ಯಪ್ ಬಳಸುತ್ತಿದ್ದಾರೆ.
ಈ ಕ್ಲಬ್ ಹೌಸ್ ಜಗತ್ತಿನ ಹೊಸ ಹೊಸ ವಿಚಾರಗಳನ್ನು ತಿಳಿಸಲು ಉಪಯುಕ್ತವಾಗಿದೆ. ಈ ಹಿಂದೆ ರೇಡಿಯೋ ಮೂಲಕ ನಾವೆಲ್ಲಾ ಸಂಗೀತ ಸಂಭಾಷಣೆ ಕಾರ್ಯಕ್ರಮಗಳು ಕೇಳಿದ್ದೇವೆ. ಆದರೆ ನಮ್ಮ ವಿಚಾರಗಳನ್ನು ಅಭಿವ್ಯಕ್ತಿಗೊಳಿಸಲು ಅವಕಾಶ ಇರಲಿಲ್ಲ. ಆದರೆ ಈ ಕ್ಲಬ್ ಹೌಸ್ ಎರಡೂ ಅವಕಾಶ ಒದಗಿಸಿದೆ. ‘ಆಡಿಯೋ ಟಾಕಿಂಗ್ ವಿತ್ ಮೆನೀ ಪೀಪುಲ್’ ಎನ್ನುವ ಹಾಗೆ ಕ್ಲಬ್ ಹೌಸ್ ತಾಣವಾಗಿದೆ. ಇಷ್ಟೊಂದು ವಿಭಿನ್ನವಾದ ಆ್ಯಪ್ ನ್ನು ತಡಮಾಡದೇ ಈಗಲೇ ಡೌನ್‌ಲೋಡ್ ಮಾಡಿಕೊಂಡು ಹೆಚ್ಚಿನ ವಿಚಾರಗಳನ್ನು ತಿಳಿಯಲು ಪ್ರಯತ್ನಿಸಿ. ಆದರೆ ಕ್ಲಬ್ ಹೌಸ್ ವ್ಯಾಸನಿಗಳಾಗದೇ ಮಿತವಾಗಿ ಬಳಸುವ ರೂಢಿ ಮಾಡಿಕೊಳ್ಳಿ. ಹೆಚ್ಚಿನ ಜ್ಞಾನ ಸಂಪಾದನೆ ಜೊತೆಗೆ ಸಾಮಾಜಿಕ ಬದಲಾವಣೆಗೆ ಕ್ಲಬ್ ಹೌಸ್ ಬಳಕೆಯಾಗಲಿ ಅಷ್ಟೇ. ಏನಂತೀರಿ?
– ಬಾಲಾಜಿ ಕುಂಬಾರ ಚಟ್ನಾಳ
ಶಿಕ್ಷಕ ಯುವ ಬರಹಗಾರ
ತಾ. ಔರಾದ್ ಜಿ. ಬೀದರ
ಮೊ. 9739756216