13 ವರ್ಷದ ನಿರೀಕ್ಷೆಗೆ ಅಂತ್ಯ – ಹರೀಶ್ ರಾಣಾಗೆ ಅಂತಿಮ ವಿದಾಯ…
ಭಾರತದಲ್ಲಿ ದಯಾಮರಣ ಕುರಿತು ವರ್ಷಗಳಿಂದ ನಡೆಯುತ್ತಿದ್ದ ಚರ್ಚೆಗೆ ಸ್ಪಷ್ಟವಾದ ಒಂದು ಘಟನೆಯಾಗಿ ಹರೀಶ್ ರಾಣಾ ಅವರ ಪ್ರಕರಣ ಇತಿಹಾಸದಲ್ಲಿ ದಾಖಲಾಗಿದೆ. 13 ವರ್ಷಗಳಿಂದ ಕೋಮಾ ಸ್ಥಿತಿಯಲ್ಲಿ ಇದ್ದ ಹರೀಶ್ ರಾಣಾ ಅವರಿಗೆ ಕೊನೆಗೂ ಅಂತಿಮ ವಿದಾಯ ಹೇಳಬೇಕಾದ ದುಃಖಕರ ಕ್ಷಣ ಅವರ ಕುಟುಂಬಕ್ಕೆ ಎದುರಾಗಿದೆ.
2013ರಲ್ಲಿ ನಡೆದ ಭೀಕರ ಅಪಘಾತದ ಬಳಿಕ ಹರೀಶ್ ರಾಣಾ ಗಂಭೀರವಾಗಿ ಗಾಯಗೊಂಡು ಕೋಮಾ ಸ್ಥಿತಿಗೆ ಜಾರಿದ್ದರು. ಆಗಿನಿಂದ ಅವರು ಯಾವುದೇ ಸ್ಪಂದನೆ ನೀಡದೆ ಜೀವನ್ಮರಣದ ಮಧ್ಯದ ಸ್ಥಿತಿಯಲ್ಲೇ ಇದ್ದರು. ಕಳೆದ 13 ವರ್ಷಗಳ ಕಾಲ ಅವರ ಕುಟುಂಬವು ಅಪಾರ ನಿರೀಕ್ಷೆ, ಪ್ರಾರ್ಥನೆ ಮತ್ತು ತ್ಯಾಗದೊಂದಿಗೆ ಅವರನ್ನು ನೋಡಿಕೊಂಡಿತ್ತು. ಒಂದು ದಿನ ಅವರು ಕಣ್ಣು ತೆರೆದು ಮಾತನಾಡುತ್ತಾರೆ ಎಂಬ ಆಶೆ ಅವರ ಮನಸ್ಸಿನಲ್ಲಿ ಸದಾ ಜೀವಂತವಾಗಿತ್ತು.
ಆದರೆ ವೈದ್ಯಕೀಯ ವರದಿಗಳು ಮತ್ತು ಪರಿಸ್ಥಿತಿಗಳನ್ನು ಪರಿಶೀಲಿಸಿದ ನಂತರ, ಹರೀಶ್ ರಾಣಾ ಅವರು ಮತ್ತೆ ಸಾಮಾನ್ಯ ಸ್ಥಿತಿಗೆ ಬರುವ ಸಾಧ್ಯತೆ ಇಲ್ಲ ಎಂಬುದು ಸ್ಪಷ್ಟವಾಯಿತು. ಈ ಹಿನ್ನೆಲೆಯಲ್ಲಿ ಕುಟುಂಬವು ಕಠಿಣ ನಿರ್ಧಾರ ತೆಗೆದುಕೊಂಡು ದಯಾಮರಣಕ್ಕೆ ಅನುಮತಿ ಕೋರಿ ಸುಪ್ರೀಂ ಕೋರ್ಟ್ ಮೊರೆ ಹೋಗಿತು.
ಮಾರ್ಚ್ 11, 2026ರಂದು ಸುಪ್ರೀಂ ಕೋರ್ಟ್ ಈ ಪ್ರಕರಣವನ್ನು ಪರಿಶೀಲಿಸಿ, ಭಾರತದ ಮೊದಲ ನಿಷ್ಕ್ರಿಯ ದಯಾಮರಣಕ್ಕೆ ಅನುಮೋದನೆ ನೀಡಿತು. ಈ ತೀರ್ಪು ದೇಶದಲ್ಲಿ ದಯಾಮರಣ ಕುರಿತ ಕಾನೂನು ಮತ್ತು ನೈತಿಕ ಚರ್ಚೆಗಳಿಗೆ ಹೊಸ ಅಧ್ಯಾಯವನ್ನು ಆರಂಭಿಸಿದೆ.
ಭಾನುವಾರ ಬೆಳಿಗ್ಗೆ ಹರೀಶ್ ರಾಣಾ ಅವರನ್ನು ದೆಹಲಿಯ ಏಮ್ಸ್ ಆಸ್ಪತ್ರೆಗೆ ಕರೆದೊಯ್ಯುವ ಮೊದಲು ಕುಟುಂಬದವರು ಭಾವನಾತ್ಮಕವಾಗಿ ಅಂತಿಮ ವಿದಾಯ ಹೇಳಿದರು. ಹಲವು ವರ್ಷಗಳಿಂದ ಬದುಕಿನ ಆಶೆಯೊಂದಿಗೆ ನೋಡಿಕೊಂಡ ತಮ್ಮ ಮಗನಿಗೆ ವಿದಾಯ ಹೇಳುವುದು ಅವರ ಪಾಲಿಗೆ ಅತ್ಯಂತ ನೋವಿನ ಕ್ಷಣವಾಗಿತ್ತು.
ಏಮ್ಸ್ ಆಸ್ಪತ್ರೆಯಲ್ಲಿ ವೈದ್ಯರು ಹರೀಶ್ ರಾಣಾ ಅವರ ಜೀವ ರಕ್ಷಕ ಸಾಧನಗಳನ್ನು ಕ್ರಮಬದ್ಧವಾಗಿ ತೆಗೆದುಹಾಕಲಿದ್ದಾರೆ. ಇದು ವೈದ್ಯಕೀಯ ಹಾಗೂ ಕಾನೂನು ಪ್ರಕ್ರಿಯೆಯಂತೆ ನಡೆಯಲಿದೆ.
ಒಂದು ಕುಟುಂಬವು 13 ವರ್ಷಗಳ ಕಾಲ ನಂಬಿಕೆ ಕಳೆದುಕೊಳ್ಳದೆ ಮಗನನ್ನು ಕಾಪಾಡಿಕೊಂಡಿತ್ತು. ಆದರೆ ಜೀವನದ ಕಠಿಣ ಸತ್ಯದ ಮುಂದೆ ಕೊನೆಗೂ ಅವರು ಕೈಚೆಲ್ಲಬೇಕಾಯಿತು. ಈ ಘಟನೆ ಮಾನವೀಯತೆ, ಕಾನೂನು ಮತ್ತು ಕುಟುಂಬದ ಭಾವನೆಗಳ ನಡುವೆ ನಡೆಯುವ ಗಂಭೀರ ಸಂಘರ್ಷವನ್ನು ಮತ್ತೊಮ್ಮೆ ನೆನಪಿಸಿದೆ.
ಹರೀಶ್ ರಾಣಾ ಅವರ ಪೋಷಕರು ತಮ್ಮ ಮಗ ಮತ್ತೆ ಎಚ್ಚರಗೊಳ್ಳುವುದಿಲ್ಲ ಎಂಬುದನ್ನು ತಿಳಿದಿದ್ದರೂ, ಇಷ್ಟು ವರ್ಷ ಅವಿರತವಾಗಿ ಸೇವೆ ಸಲ್ಲಿಸಿದ್ದರು. ಅವರ ಪ್ರೀತಿ ಮತ್ತು ತ್ಯಾಗ ಸಮಾಜಕ್ಕೆ ದೊಡ್ಡ ಉದಾಹರಣೆಯಾಗಿದೆ.
ಇಂದು ಒಂದು ಕುಟುಂಬದ 13 ವರ್ಷದ ನಿರೀಕ್ಷೆ, ಪ್ರಾರ್ಥನೆ ಮತ್ತು ನೋವು ಅಂತ್ಯಗೊಂಡಿದೆ.
ಹರೀಶ್ ರಾಣಾ ಅವರಿಗೆ ಶಾಂತಿ ಸಿಗಲಿ.
ಓಂ ಶಾಂತಿ.