ಲಾಕ್ ಡೌನ್ ದೃಶ್ಯಗಳು
ದೃಶ್ಯ- 1
ಅಮ್ಮ ಆಸ್ಪತ್ರೆಯಲ್ಲಿ
ಅನ್ನ ನೀರು ಸಿಗುವುದಾದರೆ
ನಮಗೂ ಕೊರೊನಾ ಬರಲಿ-
-ಯೆಂದು ಬೇಡಿಕೊಳ್ಳುತ್ತೇನೆ!
ದೃಶ್ಯ – 2
ಆ ತಾಯಿ ಮಗುವನ್ನು
ಹೊತ್ತುಕೊಂಡು ತಿರುಗುತ್ತಿದ್ದಾಳೆ.
ಒಂದೇ ಒಂದು ಬ್ರೆಡ್ ಕೊಡಿ.
ನಾನು ಮಗು ಊಟ ಮಾಡದೆ
ಮೂರು ದಿನವಾಯಿತೆಂದು.
ದೃಶ್ಯ – 3
ಆ ಶಹರದಲ್ಲಿ ಹಸಿದ
ಮಗುವೊಂದು ಕೈ ಚಾಚಿ
ರೊಟ್ಟಿ ಕೇಳಿತು. ಆದರೆ
ಪೊಲೀಸರ ಲಾಠಿ
ಕೈ ಮೂಳೆ ಮುರಿಯಿತು.
ದೃಶ್ಯ – 4
ಯಾರದೋ ಮನೆಯಲ್ಲಿ
ರೊಟ್ಟಿ ಕದ್ದ ನಾಯಿ ಹಿಂದೆ,
ಹಸಿದ ಬೀದಿ ಮಕ್ಕಳ
ದಂಡೇ ಓಡುತ್ತಿದೆ ಈಗ.
ದೃಶ್ಯ – 5
ಆ ಗಲ್ಲಿಯ ಕಸದ ತೊಟ್ಟಿ
ಖಾಲಿಯಾಗಿದೆ. ಆಗಾಗ
ಹಸಿದ ನಾಯಿಗಳ ಜೊತೆ
ಅನಾಥ ಮಕ್ಕಳೂ ಕಾವಲು
ಕಾಯುತ್ತವೆ.
-ಅಲ್ಲಾಗಿರಿರಾಜ್ ಕನಕಗಿರಿ