ನಿಂತಂತಾಯ್ತು ಉಸಿರು

ನಿಂತಂತಾಯ್ತು ಉಸಿರು

ನಿನ್ನೆ ಭೂಮಿ ಮೇಲೆ ಇದ್ದ
ಮಂದಿ ಇಂದು ಇಲ್ಲ
ನಾಳೆ ಎಷ್ಟು ಜನರು ಏನೋ
ಯಾರು ತಾನೆ ಬಲ್ಲ ||

ಹುಟ್ಟು ಸಾವು ನಡುವೆ ಇಹುದು
ಬೆತ್ತಲಾದ ಬದುಕು
ನಿತ್ಯದಲ್ಲಿ ಖಾಲಿ ಖಾಲಿ
ತುಂಬದ ಸಂದೂಕು ||

ಹತ್ತು ಹಲವು ಬಯಕೆಯಲ್ಲ
ನೀರ ಮೇಲಿನ ಬುರುಡೆ
ನಿಲ್ಲದಂತೆ ಓಟದಾಟ
ಸೋಲಿನಾಟ ಪಗಡೆ ||

ಕೈಯ ತಟ್ಟಿ ಕೇಕೆ ಹಾಕಿ
ಕುಣಿವೆ ಏಕೆ ಹುಚ್ಚಾ
ಕಣ್ಣಾ ಮುಚ್ಚೆ ಕಾಡೇಗೂಡೆ
ಬಟ್ಟ ಬಯಲೊ ಬಚ್ಚಾ ||

ಮತ್ತೆ ಮತ್ತೆ ಹುಟ್ಟಿ ಬರುವ
ಆಸೆ ಯಾಕೆ ಕೂಸೇ
ನುಡಿದ ಮಾತು ನಡೆಸದಾದೆ
ತಪ್ಪಿ ಹೋಯ್ತು ಭಾಸೇ ||

ಕತ್ತಲಲ್ಲಿ ಕರಡಿ ಕುಣಿತ.
ಕಾಣದಾಯ್ತು ಚಿತ್ರ
ನೂತ ನೂಲ ಎಳೆಯು ಸರಿದು
ಹರಿದು ಹೋಯ್ತು ವಿಚಿತ್ರ ||

ಉರಿವಬೆಂಕಿ ಸುರಿವಮಳೆಯು
ಇಳೆಯ ತುಂಬ ಗೋಳು
ಗಾಳಿ ಎಲ್ಲ ಘಾಟು ಘಾಟು
ಮಲಿನವಾಯ್ತು ಬಾಳು ||

ಮರವು ಗಿಡವು ಹಸಿರು ಬಳ್ಳಿ
ಎಲ್ಲ ಧೂಳು ಧೂಳು
ಗಗನ ಗಿರಿ ನದಿಯು ಝರಿಯು
ಆಗಿ ಹೋಯ್ತು ಹಾಳು ||

ಯಾರೋ ಕೂಗಿ ಕರೆದಂತಾಯ್ತು
ಕಣ್ಗೆ ಬಂತು ಮಂಪರು
ಏನೂ ಕಾಣದಂತಾಯ್ತು
ನಿಂತಂತಾಯ್ತು ಉಸಿರು ||

✍️ ಅಯ್ಯಪ್ಪಯ್ಯ ಹುಡಾ
ಬಸವನಗರ ರಾಯಚೂರು