ತಿಮ್ಮಪ್ಪನ ಮಟ್ಟಿ- ಹತ್ತಾರು ಭಾವನೆಗಳು…

ತಿಮ್ಮಪ್ಪನ ಮಟ್ಟಿ- ಹತ್ತಾರು ಭಾವನೆಗಳು…

ಕೊಪ್ಪಳದಿಂದ ಹೊಸಪೇಟೆಗೆ ಹೋಗುವ ರಾಷ್ಟ್ರೀಯ ಹೆದ್ದಾರಿಯ 12 ಕಿಲೋಮೀಟರ್ ಅಂತರದಲ್ಲಿ ಕಾಸನಕಂಡಿಗೆ ಹೋಗುವ ಮಾರ್ಗದ ಕಡೆಗೆ ತಿರುಗಿದರೆ ತುಂಗಭದ್ರಾ ಜಲಾಶಯದ ಹಿನ್ನಿರಿನಿಂದ ಆವೃತ್ತವಾದ ಸುಮಾರು ಮೂರನೂರು ಅಡಿ ಎತ್ತರದ ಒಂದು ಬೆಟ್ಟ ಕಾಣುತ್ತದೆ.

ಈ ಬೆಟ್ಟ ಪ್ರಸಿದ್ಧಿಗೆ ಬಂದದ್ದು ಕಳೆದ ಕೆಲವು ವರ್ಷಗಳಿಂದೀಚಿಗೆ.ಈ ಬೆಟ್ಟವನ್ನು ತಿಮ್ಮಪ್ಪನ ಮಟ್ಟಿ ಎಂದು ಗುರುತಿಸುತ್ತಾರೆ. ಈ ತಿಮ್ಮಪ್ಪನ ಮಟ್ಟಿಯಿಂದ ವಿಜಯನಗರದ ಅರಸರ ಅರಮನೆಗೆ ನೇರ ಸುರಂಗ ಮಾರ್ಗ ಇದೆ ಎಂಬ ಪ್ರತೀತಿ ಇದೆ. ಈ ಪ್ರತೀತಿ ಸತ್ಯವೂ, ಮಿತ್ಯವೋ ಎನ್ನುವುದು ಸಾಬೀತಾಗಬೇಕಾದರೆ ಈ ಬೆಟ್ಟದ ಪ್ರದೇಶದಲ್ಲಿಉತ್ಕನನ ನಡೆದಾಗ ಮಾತ್ರ ಇತಿಹಾಸ ಹೊರಬರಬಹುದು.

ತಿಮ್ಮಪ್ಪನ ಮಟ್ಟಿಯ ಮೇಲ್ಭಾಗದಲ್ಲಿ ನಿಂತು ಪೂರ್ವದ ಕಡೆಗೆ ಕಣ್ಣು ಹಾಯಿಸಿದರೆ ಕಾಣುವುದೇ ಹಂಪಿ ವಿರೂಪಾಕ್ಷನ ಗೋಪುರ, ದಕ್ಷಿಣ-ಪಶ್ಚಿಮಕ್ಕೆ ಅನಂತವಾದ ಜಲಾಶಯದ ಹಿನ್ನೀರು, ಉತ್ತರ ದಿಕ್ಕಿನಲ್ಲಿ ಹಸಿರಿನಿಂದ ಕಂಗೊಳಿಸುವ ವಿಶಾಲವಾದ ಭತ್ತದ ಗದ್ದೆಗಳ ಸಾಲು. ವಿಜಯನಗರದ ಅರಸರ ಕಾಲದಲ್ಲಿ ಈ ತಿಮ್ಮಪ್ಪನ ಮಟ್ಟಿಯ ಗುಹೆಗಳು ಖಜಾನೆ ಮತ್ತು ಟಂಕಸಾಲೆಗಳಾಗಿದ್ದವು ಎನ್ನುವುದು ಸ್ಥಳೀಯರ ನಂಬಿಕೆ.ಇದಕ್ಕೆ ಪೂರಕವಾಗಿ ಬೆಟ್ಟದ ಮೇಲಿರುವ ಗುಹೆಯಲ್ಲಿ ಲಕ್ಷ್ಮಿ ವೆಂಕಟೇಶ್ವರನನ್ನು ಹೋಲುವ ಶಿಲಾಮೂರ್ತಿಗಳಿವೆ. ಮುಂಭಾಗದಲ್ಲಿ ಅತಿ ಜೀರ್ಣಾವಸ್ಥೆಯಲ್ಲಿರುವ 8 ಕಂಬಗಳ ಪಾಳು ಮಂಟಪವಿದೆ.

ತುಂಗಭದ್ರಾ ಜಲಾಶಯ ನಿರ್ಮಾಣವಾದ ನಂತರದ ಏಳು ದಶಕ (70 ವರ್ಷ) ಗಳ ಅವಧಿಯಲ್ಲಿ ತಿಮ್ಮಪ್ಪನ ಮಟ್ಟಿ ಅಕ್ಷರಶ ದ್ವೀಪವಾಗಿದ್ದುದರಿಂದ ಜನ ಸಂಚಾರದಿಂದ ವಂಚಿತವಾಯಿತೆನಿಸುತ್ತದೆ. ಸುಮಾರು ಏಳು ದಶಕಗಳ ಅವಧಿಯಲ್ಲಿ ಜನರಿಗೆ ಅಪರಿಚಿತವಾಗಿ ಉಳಿದ ಈ ತಿಮ್ಮಪ್ಪನ ಮಟ್ಟಿ ಮುಳ್ಳು ಕಂಠಿಗಳಿಂದ ಕೂಡಿದ ನಿರ್ಜನ ಪ್ರದೇಶವಾಗಿ ಪರಿವರ್ತಿತವಾಗಿತ್ತು.

ತಿಮ್ಮಪ್ಪನ ಮಟ್ಟಿಯ ಹಿನ್ನೀರಿನ ನದಿಯ ದಂಡೆಗೆ ಹತ್ತಿಕೊಂಡು ಹೊಸಳ್ಳಿಯ ವಿ.ಆರ್. ಪಾಟೀಲ ಸಹೋದರರ ತೋಟವಿದೆ. ಈ ಸಹೋದರರು ತಮ್ಮ ಕಾಯಕ ನಿಷ್ಠೆಯಿಂದ ರಾಜ್ಯದಲ್ಲಿಯೇ ಶಕ್ತಿ ಉತ್ಪಾದನಾ ಕ್ಷೇತ್ರದಲ್ಲಿ ಬಹುದೊಡ್ಡ ಉದ್ಯಮಿಗಳಾಗಿ ಗುರುತಿಸಿಕೊಂಡಿದ್ದಾರೆ. ಹಾಗೆ ಕೊಪ್ಪಳ ಸಮೀಪ ಶಾರದಾ ಇಂಟರ್ನ್ಯಾಷನಲ್ ಸ್ಕೂಲ್ ಅನ್ನು ಸ್ಥಾಪಿಸಿ ಶಿಕ್ಷಣ ಕ್ಷೇತ್ರದಲ್ಲಿ ದಾಪುಗಾಲಿರಿಸಿದ್ದಾರೆ. ತಮ್ಮ ತೋಟದಿಂದ ದಕ್ಷಿಣ ಭಾಗಕ್ಕಿರುವ (ತಿಮ್ಮಪ್ಪನ ಮಟ್ಟಿ) ಬೆಟ್ಟದ ಕಡೆಗೆ ಆಕರ್ಷಣೆಗೊಂಡು ಅನ್ವೇಷಿಸುತ್ತ ಹೋದಾಗ ಮೇಲೆ ತಿಳಿಸಿದ ದೇವಾಲಯಗಳ ಸ್ಮಾರಕಗಳ ಜೊತೆಗೆ ಎತ್ತರದ ಕಲ್ಲು ಗುಂಡಿನ ಮೇಲೆ ಸುಮಾರು ಆರಡಿಯ ಏಕಶಿಲಾ ಹನುಮಂತನ ಮೂರ್ತಿ ಕಂಡುಬಂದಿದೆ.

ಧಾರ್ಮಿಕ ಹಾಗೂ ಆಧ್ಯಾತ್ಮಿಕ ಪ್ರವೃತ್ತಿಯುಳ್ಳ ವಿ.ಆರ್. ಪಾಟೀಲ್ ಸಹೋದರರು ಈ ಮಟ್ಟಿಯನ್ನು ಒಂದು ಪ್ರವಾಸಿ ಸ್ಥಳ ಹಾಗೂ ಕ್ಷೇತ್ರವನ್ನಾಗಿ ಪರಿವರ್ತಿಸಬೇಕೆಂಬ ಮಹಾದಾಸೆ ಹೊತ್ತು ಹಿನ್ನಿರಿನ ನದಿಯ ದಂಡೆಗಂಟಿಕೊಂಡು ಸುಮಾರು ಎರಡು ಕಿಲೋ ಮೀಟರ್ ರಸ್ತೆಯನ್ನು ನಿರ್ಮಿಸಿ, ಕೆಳಭಾಗದಿಂದ ಬೆಟ್ಟ ಏರಲು ಕಡಿದಾದ ಕಲ್ಲು ಬೆಟ್ಟವನ್ನು ಕೊರೆದು ಹೆಚ್ಚು ಕಡಿಮೆ ಮೂರ್ನಾಲ್ಕು ಹೇರ್ ಪಿನ್ ತಿರುವುಗಳಿಂದ ಕೂಡಿದ 800 ಮೀಟರ ಸಿ.ಸಿ ರಸ್ತೆಯನ್ನು ಕೋಟ್ಯಾಂತರ ರೂಪಾಯಿಗಳ ವೆಚ್ಚದಲ್ಲಿ ನಿರ್ಮಿಸಿದ ವಿ.ಆರ್. ಪಾಟೀಲ ಸಹೋದರರ ಛಲಕ್ಕೆ ಸಲಾಂನ್ನು ಸಲ್ಲಿಸಲೇಬೇಕು.

ಅನಾಥವಾಗಿ ಬಿದ್ದಿದ್ದ ಆರಡಿಯ ಏಕಶಿಲಾ ಮೂರ್ತಿ ಹನುಮಂತನನ್ನು ದಕ್ಷಿಣಣಾಭಿಮುಖವಾಗಿ ನಿಲ್ಲಿಸಿ, ಸುಂದರವಾದ ಕಲ್ಲು ಕಂಬಗಳಿಂದ ಕೂಡಿದ ದೇವಾಲಯವನ್ನು ಕಟ್ಟಿ ದ್ರಾವಿಡ ಶೈಲಿಯ ಗೋಪುರವನ್ನು ನಿರ್ಮಿಸಿದ್ದಾರೆ, ಹಾಗೆಯೇ ಎಂಟು ಕಂಬಗಳ ಪಾಳು ಬಿದ್ದ ಗುಹೆಯಲ್ಲಿರುವ ಲಕ್ಷ್ಮಿ ವೆಂಕಟೇಶ್ವರನ ಸಾಲು ಕಂಬಗಳ ಮೂಲ ಸ್ವರೂಪಕ್ಕೆ ಧಕ್ಕೆ ಬರದಂತೆ ಪುನರ್ ನಿರ್ಮಾಣ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ.ಜೊತೆಗೆ ಯಾರದೊ ಮಾರ್ಗದರ್ಶನದಂತೆ ವರ್ಷದ 365 ದಿನಗಳು ದಿನದ 24 ಗಂಟೆ ಅಖಂಡ ರಾಮಾಯಣದ ಪಠಣವನ್ನು ಇಲ್ಲಿ ಪ್ರಾರಂಭಿಸಿ ಅದರ ಖರ್ಚು ವೆಚ್ಚಗಳನ್ನು ನೋಡಿಕೊಳ್ಳುತ್ತಿದ್ದಾರೆ. ಅಲ್ಲೊಂದು ಧ್ಯಾನಮಂದಿರ ನಿರ್ಮಾಣದ ಜೊತೆಗೆ ಪ್ರವಾಸಿಗರ ಅನುಕೂಲಕ್ಕಾಗಿ ಅನೇಕ ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಂಡಿದ್ದಾರೆ.

ಪ್ರತಿನಿತ್ಯ ಇಲ್ಲಿಗೆ ಆಗಮಿಸುವ ಭಕ್ತರು ಹನುಮಂತ ಮತ್ತು ಲಕ್ಷ್ಮಿ ವೆಂಕಟೇಶ್ವರನಿಗೆ ಭಕ್ತಿಯನ್ನು ಸಮರ್ಪಿಸಿ, ತುಂಗಭದ್ರಾ ಜಲಾಶಯದ ಹಿನ್ನಿರಿನ ಪ್ರಕೃತಿಯ ದೃಶ್ಯವನ್ನು ಕಣ್ತುಂಬಿಕೊಂಡು ಆನಂದದ ಅನುಭೂತಿಯನ್ನು ಪಡೆದುಕೊಳ್ಳುತ್ತಾರಂತೆ.ಭಾರತೀಯ ಸಂಸ್ಕೃತಿ, ಪರಂಪರೆ ಹಾಗೂ ಸನಾತನ ಧರ್ಮದ ಸಂಪ್ರದಾಯಗಳನ್ನು ಉಳಿಸಿಕೊಂಡು ಹೋಗುವಲ್ಲಿ ವಿ.ಆರ್. ಪಾಟೀಲ್ ಸಹೋದರರಿಗಿರುವ ಶ್ರದ್ದೆ ಮತ್ತು ನಿಷ್ಠೆಯನ್ನು ನೋಡಿ ಅವರಿಗೆ ಇನ್ನಷ್ಟು ಶಕ್ತಿ ಸಾಮರ್ಥ್ಯಗಳನ್ನು ಕೊಡು ಎಂದು “ಆಸ್ತಿಕರು” ತಾವು ನಂಬಿದ ದೇವರುಗಳಲ್ಲಿ ಪ್ರಾರ್ಥಿಸುವ ದೃಶ್ಯ ಇಲ್ಲಿ ಸಾಮಾನ್ಯ.

ನಾಸ್ತಿಕರು ಈ ಬೆಟ್ಟದ ಮೇಲಿನ ಪ್ರಶಾಂತ ಸ್ಥಳದಲ್ಲಿ ಧ್ಯಾನಸಕ್ತರಾಗಿ, ಜನ ಕುರುಡು ಕಂದಾಚಾರ,ಮೌಡ್ಯತೆ, ಕರ್ಮ ಸಿದ್ದಾಂತದ ಕಡೆಗೆ ಇನ್ನಿಲ್ಲದ ರೀತಿಯಲ್ಲಿ ಆಕರ್ಷಿತರಾಗುತ್ತಿದ್ದಾರಲ್ಲ ಎಂದು ಯೋಚಿಸುತ್ತಲೇ ಲಿಂಗ ಭೇದ ತಾರತಮ್ಯವಿಲ್ಲದ, ಅಸಮಾನತೆ, ಶೋಷಣೆ, ಅಸ್ಪೃಶ್ಯತೆ, ಕರ್ಮ ಸಿದ್ದಾಂತದ ಹಂಗಿಲ್ಲದೆ ದೇಹವನ್ನೇ ದೇವಾಲಯ ಮಾಡಿಕೊಂಡು ಕಾಯಕ ನಿಷ್ಠೆಯ ಮೂಲಕ ಸಮ ಸಮಾಜದ ನಿರ್ಮಾಣಕ್ಕಾಗಿ ಸಂಕಲ್ಪ ಮಾಡಿಕೊಂಡು ಕಾರ್ಯನಿರತರಾಗಲು ಈ ಬೆಟ್ಟ ಸ್ಪೂರ್ತಿಯನ್ನು ನೀಡುತ್ತದೆ ಎನ್ನುವ ಭಾವ ನಾಸ್ತಿಕರದು.

ತಿಮ್ಮಪ್ಪನ ಮಟ್ಟಿಯ ಮೇಲ್ಭಾಗದಲ್ಲಿ ನಿಂತುಕೊಂಡು ತುಂಗಭದ್ರಾ ಜಲಾಶಯದ ಹಿನ್ನಿರಿನ ದೃಶ್ಯಗಳನ್ನು ಕಣ್ತುಂಬಿಕೊಳ್ಳುತ್ತ ನೂರಾರು ವರ್ಷದ ಶ್ರೀಮಂತ ನಾಗರಿಕತೆ ಇದ್ದಕ್ಕಿದ್ದಂತೆ ಜಲಾಶಯದ ಹಿನ್ನಿರಿನಲ್ಲಿ ಮುಳುಗಿ ಹೋಯಿತಲ್ಲ ! ಮುಳುಗಿದ ಗ್ರಾಮಗಳಲ್ಲಿದ್ದ ತಮ್ಮ ಪೂರ್ವಜರು, ಬದುಕಿ ಬಾಳಿದ ಮನೆ-ಮಠಗಳನ್ನುಗಳನ್ನು ತೊರೆದು ಮಕ್ಕಳು-ಮರಿ, ದನ-ಕರುಗಳೊಂದಿಗೆ ಎಲ್ಲೆಲ್ಲೂ ವಲಸೆ ಹೋಗಿ ತಮ್ಮ ಬದುಕನ್ನು ಕಟ್ಟಿಕೊಳ್ಳಲು ಎಷ್ಟೊಂದು ಭವಣೆಪಟ್ಟಿರಬೇಕು.ಒಂದು ತಲೆಮಾರಿನ ಜನಪದವೇ ಕಣ್ಮರೆಯಾಯಿತಲ್ಲ ಎಂದು ನೆನಪಿಸಿಕೊಳ್ಳುತ್ತಾ ಶೂನ್ಯತೆಯ ಭಾವದಲ್ಲಿ ಭಾವಕರು ಮುಳುಗಿ ಹೋಗಬಹುದು.

ತಣ್ಣಗೆ ನಿಸರ್ಗದ ಮಡಿಲಲ್ಲಿದ್ದ ಈ ಬೆಟ್ಟಕ್ಕೆ ಪ್ರವಾಸಿ ತಾಣದ ಸ್ಪರ್ಶಕೊಟ್ಟು ಪರಿಸರವನ್ನು ಹಾಳು ಮಾಡುತ್ತಾರೆನೋ ಎನ್ನುವ ಆತಂಕದ ಭಾವ ಪರಿಸರಪ್ರಿಯರದ್ದು

ನಿಸರ್ಗದ ಮಡಿಲಲ್ಲಿ ಅನಾಥವಾಗಿದ್ದ ಈ ಬೆಟ್ಟಕ್ಕೆ ಪ್ರವಾಸಿ ತಾಣದ ಸ್ಪರ್ಶವನ್ನು ಕೊಟ್ಟು ವಿ.ಆರ್. ಪಾಟೀಲ ಸಹೋದರರು ಪ್ರಸಿದ್ಧಿಗೆ ಬಂದರಲ್ಲ ಎಂದು ಚಡಪಡಿಸುವ ಭಾವ ಅಸಹಾಯಕರದ್ದು.

ನಿಮ್ಮ ಭಾವನೆ ಎಂತದ್ದೇ ಇರಲಿ ಪರವಾಗಿಲ್ಲ.ನೀವೊಮ್ಮೆ ಈ ಬೆಟ್ಟವನ್ನು ಏರಿ ನಿಸರ್ಗದ ಅನಂತತೆಯನ್ನು ಕಣ್ತುಂಬಿ ಕೊಂಡು ಆನಂದದ ಅನುಭೂತಿಯನ್ನು ಪಡೆದುಕೊಳ್ಳುವುದರಲ್ಲಿ ನಷ್ಟವೇನಿಲ್ಲ.

ಇಷ್ಟೆಲ್ಲ ಹೇಳುವ ನೀವು ಆಸ್ತಿಕರೋ ? ನಾಸ್ತಿಕರೋ ? ಭಾವುಕರೋ ? ಅಸಹಾಯಕರೋ ? ಎನ್ನುವ ನಿಮ್ಮ ಪ್ರಶ್ನೆಗಳ ಬಾಣಕ್ಕೆ ಅನ್ವೇಷಕನಾದ ನಾನು ಏನನ್ನು ಹೇಳಲಾರೆ.

.. ಗವಿಸಿದ್ದಪ್ಪ ಕೊಪ್ಪಳ