ಗಝಲ್

ಗಝಲ್

ಸುಮ್ಮನಿರು- ರದೀಫ್ ಬಳಸಿ

ಹಾದಿಯಲಿ ಮುಳ್ಳುಗಳಿದ್ದರೂ ಸರಿಸಿ ನಡೆಯಬಹುದು ಸುಮ್ಮನಿರು/
ಹಣತೆಯ ತೈಲಕಸಿದರೂ ನಕ್ಷತ್ರ ಗಳ ಬೆಳಕಿಹುದು ಸುಮ್ಮನಿರು/

ಕತ್ತಲೆಯ ಗೂಡಿನಲ್ಲಿ ತಪ್ಪಿರದ ನಿನ್ನನ್ನು ಕೂಡಿಟ್ಟಿಹರು/
ಬಿಸಿಲಕೋಲೊಂದು ತೂರಿಬಂದು ದಾರಿ ತೋರಿಹುದು ಸುಮ್ಮನಿರು/

ಕೂಗದಂತೆ ನಿನ್ನ ದನಿಯ ಮೌನಶರಧಿಯಲಿ ಮುಳುಗಿಸಿರುವರು/
ಮೆಲುಮಾತಿನ ತೆಪ್ಪವೊಂದು ತೇಲಿ ಬರುತಲಿಹುದು ಸುಮ್ಮನಿರು/

ಓಡಿ ಗುರಿಮುಟ್ಟದಂತೆ ಕಾಲುಗಳಿಗೆ ಸಂಕೋಲೆಯ ತೊಡಿಸಿಹರು/ಹರಿದೊಗೆದು ತೆವಳುತ್ತಲೇ ಮುಂದೆ ಸಾಗಬಹುದು ಸುಮ್ಮನಿರು/

ಕನಸಿನಂಗಳದ ಚಲುವ ಚಿತ್ತಾರಗಳನೆಲ್ಲ ಹೊಸಕಿ ಹಾಕಿಹರು/
ತುಳಿದು ಅಳಿಸಿದರೂ ಮತ್ತೆ ಬೆಳೆದುನಿಲ್ಲಬಹುದು ಸುಮ್ಮನಿರು/

ಬೆದರಿಕೆಗಳಿಗೆ ಹೆದರಿ ಅನಾಚಾರಗಳಿಗೆ ನಲುಗಿ ಉಡುಗಬೇಡ/
ಇಂದು ಬಿದ್ದರೂ ನಾಳೆ ತಲೆಎತ್ತಿ ಬಾಳಿಬದುಕಬಹುದು ಸುಮ್ಮನಿರು/

–ಇಂದಿರಾ ಮೋಟೆಬೆನ್ನೂರ. ಬೆಳಗಾವಿ.